इंदापूर : प्रतिनिधी
●इंदापूर महाविद्यालयात ऑक्सीजन पार्कची निर्मिती होणार.
●अनेक प्रकारच्या झाडांचे,फुलांचे संगोपन होणार.
●अनेक प्रकारचे पक्षी, विविध जातींची फुलपाखरे यांच्या वास्तव्यांमुळे महाविद्यालयाच्या सौंदर्यात भर पडणार.
या सृजनशील उपक्रमाअंतर्गत अॉक्सिजन पार्क मध्ये छोटी छोटी एकूण सात बागांमध्ये वने विकसित करण्यात आली असून यामध्ये वड,पिंपळ,उंबर,अर्जुन सादडा,सिसम,पुत्रंजीवी,हत्तीलिंग,बेल,बेहडा,हिरडा,कैलासपती,कडुनिंब,जाई,जुई,मोगरा,सायली,कृष्णकमळ,पारिजातक,रुई,गोकर्ण,सोनचाफा, हिरवा चाफा,पिवळा चाफा,गुलमोहर,निलमोहर,शंखासुर, चिंच,विलायती चिंच,काटेसावर,कण्हेर,चंपा,बॉटलपाम, नारळ,ऑरोकॅरिया यासारख्या वनस्पतींची लागवड करण्यात आली आहे.
या अॉक्सिजन पार्क निर्मिती करता श्री.नारायणदास रामदास पब्लिक चॅरिटेबल ट्रस्ट च्या 'शहा नर्सरी' मधून वरील रोपे मोफत उपलब्ध झाली.
या ऑक्सिजन पार्कमध्ये चिमणी,मैना,दयाळ,साळुंखी, मुनिया,टीपकेवालीमुनिया,टिटवी,पानकावळा,कोरमोरंड, ब्राह्मणी घार,ताम्हण,घुबड,ब्राह्मणी मैना,भारद्वाज, वटवाघुळ,पारवा,कबुतर,वेडाराघू,पोपट,बाया,सुगरण,सुतार, लालबुड्या,कोतवाल यांसारखे अनेक पक्षी वास्तव्य करत आहेत.
तसेच विविध जातींची फुलपाखरे व पतंग आहेत.एकूण सात बागांमध्ये जैव विविधता जोपासत ऑक्सिजन पार्क ची निर्मिती झाली आहे.
या पार्क निर्मितीमध्ये विद्यार्थी कल्याण मंडळ, राष्ट्रीय सेवा योजना, राष्ट्रीय छात्र सेना तसेच शिक्षकेतर कर्मचारी यांचे विशेष योगदान लाभले आहे.
या अॉक्सिजन पार्कमध्ये असलेल्या वेगवेगळ्या प्रकारची फुले,पक्षी आणि निसर्गरम्य वातावरण यामुळे हा परिसर महाविद्यालयाच्या सौंदर्यामध्ये भर घालत आहे.
